《蘋果》一向係都容易招惹愛字頭人士關注，將軍澳大樓外經常都有唔少示威者。噚日一早，壹蘋果大樓外就有幾個人舞旗吶喊，搞到一眾保安哥哥大為緊張，八方出去一睇，原來係嚟《蘋果》大樓出席論壇嘅趙佩玉同佢助選團，喺參加前祈禱祝福，事前又唔單聲，真係嚇親寶寶。
自稱受上帝感動而參選嘅性傾向條例家校關注組成員趙佩玉，原來噚日一早已同助選團抵達《蘋果》大樓外，但佢冇入大樓，反而就留喺閘外開壇舞旗跳舞，更加吹埋號角。由於佢哋嚇親保安哥哥，所以八方都勸喻佢哋暫停。至於事前跳舞祈禱，係唔係可以令趙佩玉論壇表現「如有神助」，大家就要睇吓蘋果facebook，留個言，畀意見喇！