今日元宵佳節，apm就舉辦「香港婚嫁囍事回顧展」，展出多款50年代至70年代本港水鄉婚嫁珍品，包括蜑家人嘅嫁妝同喜帳，呈現昔日漁民喺水上棚屋穿梭迎娶新娘嘅嫁娶文化。原來以前香港嘅水鄉婚禮，歷時3日3夜，男家親戚會坐喺掛有大紅燈籠嘅舊式木舢舨，載住36盒聘禮，沿住水道浩浩蕩蕩咁搖到棚屋迎娶新娘。
展覽仲有香港開埠至今嘅黑白及彩色菲林結婚照、逾50年歷史嘅圓形禮餅擔盒、1970年代漁民獨有嘅婚嫁茶盤及器皿、以及舊式磁石日曆及拍婚照必備嘅海鷗牌古董相機等。新鴻基地產（中國）執行董事馮秀炎話，農曆新年長假及情人節，商場人流約430萬，營業額約1.8億元，均較去年升約15%至20%，預計元宵節連同周末及周日，人流可達100萬，較去年升約15%。