出任強積金管理局主席近3年嘅黃友嘉噚日終於處男下海，喺積金局網站發表首篇網誌「積金‧誌」，食正前日發表嘅財政預算案，話好贊同財爺建議為強積金自願性供款提供扣稅優惠，議題夠晒新鮮熱辣。
黃友嘉舉例指一個25歲年輕人月入1.55萬元，往後40年連同僱主供款，每月合共供款1,550元。假設強積金年率化淨回報為2%，佢65歲退休時可提取嘅強積金總額約114萬元，直至85歲期間，每月就有4,700元收入。如果每月再額外供款500元，退休後每月就有6,300元，多收1,600元。
佢話明白好多人擔心「臨老過唔到世」，強調退而無憂單靠強積金唔夠，但指相比零售基金，強積金基金冇買賣差價、冇收取認購或贖回費，強調及早做好退休儲蓄，就離無憂生活目標更近。