立法會3.11補選下周日舉行，各方候選人頻頻出動拉票，港島區代表民主派參選嘅區諾軒就因為忙於選舉工程，搞到棉婚（即係結婚兩周年）紀念日都被迫延遲多日先慶祝，好在區太大人有大量，唔係跪玻璃都唔掂呀！
紀念日對唔少女人嚟講好重要，本周一結婚兩周年紀念嘅區諾軒亦深明此道理，專登請咗一日假打算同太太食飯慶祝，但世事往往唔會盡如人意，區諾軒當日因為臨時有事甩咗老婆底，延至前日先可以慶祝。佢話好在老婆體諒佢選舉忙碌，都無詐型，透露送咗盒棉花畀區太，至於有咩寓意？佢只透露同玉桂狗有關，詳情係兩個人之間嘅秘密！
老婆對於佢參選，有冇唔高興？區諾軒話知道自己會少咗時間陪老婆，所以會更加用心思𠱁佢，唔知區太收唔收貨？