當特首林鄭月娥都讚好新一份預算案，民政事務局長劉江華前日竟然唔見人，冇現身聽財爺陳茂波宣讀娥班子任內處男作，食咗豹子膽乎？但嚟自民建聯，邊有作反嘅基因？查實劉江華去咗泰國訪問，前日就同泰國文化部部長Vira Rojpojchanarat會面，簽署文化合作備忘錄，佢話加埋去年同東盟簽訂嘅自由貿易協定，為香港喺一帶一路框架下創建咗有利環境喎。
劉江華此行亦同泰國旅遊及體育部部長顧問Apichart Chirabandhu會面，分享推動體育發展嘅經驗，同時參觀泰國體育局，了解足球同排球訓練情況，夜晚則喺曼谷中國文化中心欣賞兩名香港年輕音樂家陳壁沁同何卓彥及其團隊嘅演出，噚日已經啟程返港。