有線（1097）舊年5月易手永升，一直留守喺有線嘅行政總裁兼授權代表關則豪終於功成身退。有線出公告指，關則豪為投放更多時間於個人發展及業務承擔，決定辭任現有職務，即日生效，執董邱華瑋同日被委任為授權代表。
邱華瑋係邱達昌個仔，據舊年9月委任佢做執董嘅通告，邱華瑋28歲，相當年輕。除咗有線，佢亦係德根飯店國際、地產公司Land Pacific、學生住屋公司Ariana Social Community嘅創辦人，真係多瓣數。
唔講唔知，離開嘅關則豪係恒隆地產（101）集團傳訊及投資者關係董事關則輝（CF）細佬。
有線易手前，董事會入面，執董只有前主席吳天海同關則豪，公司大小事如財務會計、企業發展、投資者關係、外購頻道等都由佢負責，即使吳天海舊年9月辭任執董、CEO同董事會主席職位，關則豪仍然留守有線搞好交接工作，如今有線似乎交接順利，關則豪終於都可以退落嚟。
李華華