十三屆冠軍騎師韋達喺昨晚（2月28日）嘅八場沙田泥地夜宴，正處於停賽坐馬監階段，按道理應會留家休息，或者趁空檔去一個短暫旅行，但係佢最終選擇入場觀戰。
而喺跑第七場之前，《蘋果》記者發現十三少同練馬師大摩企得好埋，仲不斷咬耳仔傾咗勁耐；而兩位嘅夫人就企隔籬另開小組傾計。
當韋達見到《蘋果》攝記影佢嘅時候，佢罕有地立即遮面，唔想俾人知自己同大摩有交流。
其實，近期馬圈盛傳，呢位十三屆冠軍騎師韋達大有機會跑埋今季就掛靴，而未來有機會出任大摩副練一職。
早前韋達收操後，曾喺烽火台同大摩傾好耐。當佢離場之際，《蘋果》有問及上述傳聞，但佢只簡單兩句回應說：「我不知道（I don't know） ，我不肯定（I am not sure） 」，說罷便禮貌地微笑離開；但今次卻選擇迴避鏡頭，更顯得傳聞嘅真確性。
值得一提，韋達今期與大摩合作三駒，分別為頭場「軍力勁」、第八場「勁揪」及第九場「多紅利」，可能有料到都唔定。