AC米蘭近排勢頭唔講得笑,喺周三意盃四強次回合,作客拉素踢足120分鐘互無紀錄,兩回合踢成0:0,結果A米互射12碼贏5:4入決賽會鬥祖雲達斯。A米連續13場比賽不敗,教練加度素喺上年年尾接手時,首場賽和當時一分都冇嘅賓尼雲圖,時移世易,家下已經變成A米救星!
新保方救六個必入波
A米今場作客拉素係下風波,不過新星龍門基安盧基當拿隆馬全場救咗六球波,去到互射12碼階段,A米頭兩輪主射嘅列卡度洛迪古斯同蒙杜利禾都射失,而拉素就有恩莫比尼率先射入,不過,當拿隆馬連擋米連高域沙域同盧卡斯喺第二、三輪嘅射門,加上隊友邦拿雲度拉第三輪射入扳平1:1。兩隊之後三輪都入晒,直到第七輪拉素嘅菲臘安達臣射出界,A米靠後衞阿利斯奧羅馬洛尼射入,5:4擊敗拉素入決賽。
同日另一場四強次回合,祖雲達斯靠中場比真歷射入12碼,主場1:0險勝阿特蘭大,合計贏2:0晉級。A米近13戰不敗,近六場仲未失一球,季中接手嘅教練加度素當然係功臣之一。佢喺意盃次回合賽後話:「拉素經常喺主場贏對手四五球,今場波我哋踢得相當唔錯,有唔少入球機會,當然亦有好幾次幾乎失波。我哋有自己嘅足球理念,AC米蘭喺今屆意盃仲未失過一球,係全隊所有球員嘅努力,每一位球員都有參與防守。」
「我唔係戰術大師」
執教A米初期,加度素嘅前景俾唔少人睇淡,第一場作客2:2和當時仲係零分嘅魚腩賓尼雲圖,又作客0:3輸俾弱旅維羅納,甚至有傳佢好快落台!佢回應話:「我承認我仲未係一位偉大教練,唔係戰術大師,未得到過任何重要成就。但我亦唔係某啲人眼中咁無能,過去五年我一直都有努力,贏過一次意丙冠軍。」
加度素上任後逐樣執番好,陣式由三後衞變做4-2-3-1,而且以前教青年軍嘅佢,重用青訓出身嘅20歲前鋒柏德列古度尼、21歲右閘卡拿比亞,連埋基安盧基當拿隆馬同20歲中場文路爾盧卡迪利,令隊波充滿生氣。