個個都想搞大灣區，唔通個個都想搞大灣區咩？即將北上兩會嘅政制局前局長譚志源（Raymond）作為新生不容有失，呢次會就住阿爺關心嘅議題交功課。
為趕上咗高鐵西九站通車熱，Raymond建議中央部委考慮推出「香港青年學生高鐵自由行優惠券」，為喺香港或內地讀大學嘅港青提供價錢相宜嘅高鐵優惠券，等佢哋可以喺暑假6至8月多次搭高鐵，寓旅遊於了解國家發展。
至於阿爺嘅baby大灣區，佢特別就住發展區內醫療產業提建議，關注香港註冊醫生喺區內嘅執業許可同稅務寬免，以及醫療機構嘅設立同運作等等問題。嗱，一月喺惠州舉行嘅首屆粵港澳大灣區衞生與健康合作大會，擔任新風天域集團嘅醫療副主席嘅Raymond都有出席，所以醫療發展點會唔係佢重點？