原來今時今日開銀行戶口，真係唔使再去分行排隊！信銀國際成功搶到頭啖湯，用手機下載inMotion動感銀行程式，畀電話及電郵，再用手機掃瞄身份證、自拍影張相、填埋簡單個人資料，就可以非面對面的情況下遙距開戶。
你可能會擔心，點樣辨別出係開戶本人又或者資料會否外洩等保安問題，查實信銀早前就已經試推個apps，用上創新技術例如人工智能、光學字符識別、臉部識別、活體檢測，仲有全方位測試，不過最重要都係過到金管局個「沙盒」。
信銀就形容今次係「踏出虛擬銀行第一步」，皆因開到戶口先可以做到其他銀行服務，現階段雖然只提供定存、兌換外幣、滙入滙出款項等簡單銀行服務，但之後希望逐步加入財富管理、信貸等服務，至於係咪有意第日申請虛擬銀行牌照，管理層笑住話「會積極研究係咪需要」。
講到最有趣，華華就覺得係信銀用太空人去包裝，話有咗遙距開戶，太空人都唔使憂開唔到戶口，仲可以好似太空人咁實現「無重狀態」，點解？因為你只係會收到電子賬單囉。
李華華