財爺陳茂波喺娥班子下首份預算案，喺庫房水浸下拒全民派錢，全城鬧爆，包括已卸任立法會主席嘅民建聯曾鈺成。阿曾喺報章撰文話，「還富於民是唯一合理合法的做法」，指政府唔肯派錢無非因為「不能接受財富再分配的理念」，仲認為下年度政府開支增長率大幅超過本地生產總值增長率，或牴觸《基本法》第107條喎，唔知曾獲曾鈺成撐做特首嘅前財爺曾俊華，覺得曾主席之言有冇道理？
指有牴觸《基本法》之嫌
曾鈺成喺《am730》專欄以〈不肯派錢〉為題寫文，斥政府庫房水浸但拒絕派錢，而政府開支受制於《基本法》而不能過度膨脹，所以當政府收入大幅拋離經濟增長時，還富於民是「唯一合理合法的做法」，佢強調將一部份預算收入還畀市民，唔等於叫政府少做改善服務及投資未來。
阿曾坦言攞四成盈餘「與市民共享」並唔算多，當中嘅紓困措施如退稅、免差餉、綜援發三糧，以及利用關愛基金協助N無住戶等，雖然有唔少人受惠，但都畀人感覺「跟政府錄得的龐大盈餘並不相稱」，又話《基本法》第107條列明「香港特別行政區的財政預算以量入為出為原則，力求收支平衡，避免赤字，並與本地生產總值的增長率相適應」，指下年度政府開支增長率已大幅超過本地生產總值的增長率，係回歸以來首次，有牴觸《基本法》之嫌。
李八方