剛過去的星期日（2月25日），由告東尼訓練的「馬克羅斯」以不足兩分鐘時間，跑畢2000米路程，並勝出三冠大賽次關香港金盃。
當時賽後，馬會搵了「馬克羅斯」鞍上人潘頓同其他騎師做訪問，並將片段上載至社交網絡平台。
相關片段內有個搞笑的騎師互動鏡頭出現。其中，接受訪問的田泰安，一早換定「五十五十」的綵衣，為之後跑女皇銀禧紀念盃做準備。
當安仔好正經講緊嘢之時，大摩主帥貝湯美咁啱，喺佢旁邊經過。Tommy仔見到訪問開始咗，即刻搞鬼搞馬，將自己手指啜入口，然後將疑似沾了口水的手指，篤落安仔的左邊耳仔，而當時做緊訪問的安仔阻擋唔到佢，只好對住鏡頭苦笑。
雖然貝湯美呢次玩嘢，睇落唔太衛生，但係睇得出佢兩個都係玩得之人。或者好快見到安仔點向貝湯美反擊「報仇」，不妨拭目以待。