歷任財爺喺立法會宣讀預算案時，議員經常各自各精采，噚日就有兩位女議員突圍而出，憑重口味解悶方法受注目。
着到成個利是封咁嘅新民黨主席兼行會成員葉劉淑儀，噚日席上就頻頻睇相，張相有咩特別？原來係睇立會議員前日參觀高鐵西九站時，佢同建制派張大合照。大家又唔好忘記，葉劉係高鐵一地兩檢法案委員會嘅主席嚟㗎，特別關心條鐵亦似乎幾合理咁噃。
另一邊廂，經民聯梁美芬被發現猛睇早排拉埋天窗嘅李偲嫣嘅一篇舊報道，睇完仲會心微笑。八方發現鼠王芬睇嘅，係「立場新聞」2016年10月一篇題為「被指控『色誘』騙財 李偲嫣稱中傷 將公開訊息記錄還擊」嘅報道。八方會後問過鼠王芬篇文章有咩咁特別？佢好似有啲尷尬咁話：「我係睇吓，笑吓之嘛！」