韓國天團BIGBANG隊長G-DRAGON前日入伍，會喺江原道鐵原郡陸軍第3師團白骨部隊新兵教育大隊進行為期5周嘅訓練，並於明年11月26號退伍，令粉絲相當不捨，當日仍有逾百粉絲到現場等見偶像一面。
而日前有一名男性VIP(BIGBANG粉絲名稱)喺網上發文，表示自己行好運，與偶像GD一樣被分配到第3師團白骨部隊，引起粉絲及網民熱議。該男粉絲寫道：「我居然同GD同一屆入伍，之前有見到GD入伍嘅消息，但冇乜點注意，只係感嘆自己嘅偶像已經要入伍，點知搜尋後先發現，居然係同我一樣嘅第3師團白骨部隊。」
該男粉絲喺文中表示自己由小學時期已經係GD嘅粉絲，同時又公開兵務廳嘅短訊，相當開心地表示：「諗到同GD共度軍隊生活就非常激動，睇嚟我唔使等佢嘅空白期喇！明明我都要入伍，點解仲可以咁開心？哈，實在瞓唔着啊！」相當可愛。而貼文一公開立即引起關注，令唔少粉絲留言表示：「男粉絲勝利了」、「真係好羨慕，你都要健健康康啊」、「空白期直接變同期」等。