財政司長陳茂波喺娥班子首份預算案，宣讀時間長達兩粒鐘，其實聽得悶悶地睡魔急call，八方都覺得係人之常情，好似娥班子嘅官員中，都有人喺波叔宣讀預算案時疑似「釣魚」，好似財經事務及庫務局局長劉怡翔咁，其間就一度「閉目養神」，又難道係細心靜想分析緊，呢份預算案推唔推動到香港財金發展？
與此同時亦有唔少局長，執筆抄低預算案內容，好似食衞局局長陳肇始、運房局局長陳帆咁吖，不時低頭密密抄，同學生哥一樣咁勤力。
而喺波叔宣讀預算案前，早到咗嘅局長都喺位閒聊，近期讚過下屬利敏貞「着衫有亮點，講嘢有重點」嘅商經局局長邱騰華，同政制局局長聶德權及勞福局局長羅致光傾談期間，佢一度笑開懷，唔知係咪發現咗另一位衣着達人？