任娥班子財爺嘅陳茂波，首份預算案千呼萬喚始出來。庫房水浸下，除咗直接派錢唔做之外，各範圍都增撥唔少資源，對唔少人嚟講都有大利是。咁啱佢呢份預算案，就用咗「橙紅色」為封面，似乎想配合新年大利是感覺，而佢嘅太太許步明噚日亦以一身熟透橙紅裝現身立法會公眾席，仲豎起拇指為老公打氣。
睇番呢份橙紅色嘅預算案，結尾冇引用歌詞，四平八穩咁，似乎唔想太凸出，以免搶咗特首林鄭風頭咁。而原來呢隻橙紅色，部份傳媒覺得令人聯想起上屆特首梁振英，嘩，咁樣好大罪名喎！陳茂波就解釋，話同事、即係佢新聞秘書話佢聽，呢隻其實係「暖紅色」至真，代表耳目一新、朝氣勃勃，可以象徵新政府上場；時值新正頭，亦象徵喜慶洋洋㖭。
向老公揮手豎拇指
而噚日朝早約10時43分、即係宣讀預算案前約15分鐘，陳茂波已經到咗立法會準備，其間面露笑容，被問到預算案係咪有好消息公佈時回應說都係賣關子，只以「早晨」做回應。佢太太許步明其後亦到公眾席旁聽，席間表現得好興奮，向喺議事廳內的另一半揮手同舉起手指公，瞓身支持老公。