中國內地人如有辦法，因市場太大，賺錢好容易，如果唔係，普通一個縣長都可以收賄款十億八億元人民幣，試問錢從何來？行賄之人如果冇大錢賺，白白送大禮畀縣長、市長做乜喎？
正因內地人（有必需要講明，係有辦法之內地人，根據一啲學院派研究，中國大陸貧富極度懸殊，幾億人處於貧窮狀況，故此習近平大力講減貧扶貧）銀紙不缺，有了錢就驚住一啲死硬左派話共產黨本意係消滅私有制（中國人民大學馬克思主義學院教授周新城狠批張五常），如果習近平信咗，咪弊弊弊？於是大量有錢人為求保命保家財，用盡辦法移民，利用西方國家之開放透明制度，群相螞蟻搬家，到澳洲紐西蘭加拿大買樓買屋，安置家人親戚，打本畀新移民在彼邦開舖頭做生意，一旦內地出事，外邊親人仍然富裕。中國成語狡兔有三窟，最符合內地豪客狀況。
最近加拿大卑詩省為房地產加辣，向外來人買樓徵收20%稅款，澳洲又有針對外人之買樓招數，一睇就知，主要係防止中國內地人炒高當地樓價屋價，但對早已移民入籍之華裔澳籍居民，未必有用。
紐約時報（2月19日）報導，到澳洲落地生根之華裔澳洲人，有一種新做法，令澳洲政府好唔高興，但又未有即時行動制止。據報，一名Winnie Tuan女士在雪梨近郊一間中國餐館HuTong Hotpot（胡同涮肉）做侍應，返工第一日，經理問佢：「台灣是否中國的？」Winnie來自台灣，答：「不是。」經理二話不說，即刻炒咗佢。Winnie在一月九日將自己經歷在Facebook上載，於是在澳洲華人界瘋傳，第二日，「環球時報」發表文章，盛讚（胡同涮肉）愛國，於是事件引起傳媒注意，再三訪問之下，原來Winnie被炒之事，並非個別，不少台灣人到澳洲做「工作假期」，都回報有類似事件，一講錯答案，就會畀內地人老闆炒魷。中國內地人自2006年以後，移民澳洲人數增加一倍至510,000人，台灣移民只有五萬左右，論人數，論財力，內地人佔壓倒性優勢，台灣人無力對抗。既然入咗澳洲籍，內地人還搞呢一套愛國主義？中國人DNA係身在曹營心在漢，入籍歐美澳加紐只係為咗旅行方便及避免肖建華事件，但家庭和生意聯繫仍然與中國分不開，兼且呢，在澳洲開餐廳要倚賴內地供應嘛，澳洲政府有「公平工作法」，禁僱主因任何政治意見理由，開除員工及歧視員工，但中國人唔buy呢一套，唔怪知得澳洲與中國之外交關係，不時有暗湧。