英國部份地區呢幾日都好大雪，周二有多場低組別聯賽都因為天氣問題被逼擇日重賽。不過英甲彼德堡對華素爾嘅英甲就要喺零下三度兼且大雪嘅環境下作賽，球員都要幫埋手去鏟雪。由於當地雪越落越大，球證被逼喺下半場中段暫停比賽，雙方球員都暫時返到更衣室休息，不過主隊後衛史堤芬泰萊就留喺球場，仲拎起工具幫手鏟雪（圖），結果好心有好報，最後彼德堡以2:1擊敗對手。