愉園呢支昔日香港足球班霸，14年因為假波醜聞同埋財政問題，不幸要降班作賽，16年更加跌到落丙組。今個球季升番上乙組，家陣排緊喺榜首，而喺禮拜日對天旭，有球員仲射入咗一球「有今生冇來世」嘅碧咸式金球㖭。話說愉園嘅fb專頁噚日post咗段片，踢後衞、有「阿佬」之稱嘅馬文俊（小圖），乘住隊友同對手中場爭奪，個波漏後，佢諗都唔諗，喺半場前少少嘅右路位置，50幾碼一嘢轟落去，轟出咗一條美麗弧線破網，收死埋天旭嘅門將。呢條片上載短短幾個鐘，已經有超過500個like，仲有成170個share。「阿佬」向求大俠回應話：「其實只係全心解圍，見順勢於是大腳抽上去。入咗都覺得意外，估唔到會咁。」
射入金球嘅馬文俊現年41歲，球員生涯除咗愉園，亦效力過晨曦、深水埗等，14/15球季仲踢過當時喺港超嘅黃大仙。有網友爆料話佢閒時會代表曼聯球迷會踢聯賽，再睇個金球，真係拍得住當年碧咸笠死溫布頓嗰一腳。