相信意大利球迷對世界盃外圍賽附加賽被瑞典淘汰出局後，保方喊住告別國家隊嘅一幕依然記憶猶新。各位「意粉」，唔使唔開心嘅，因為呢位40歲嘅老將決定再次代表國家隊上陣喇！呢位為意大利上陣175次嘅門將保方，將會相隔四個月，再披上國家隊戰衣，出戰三月份對阿根廷同英格蘭嘅國際賽。呢位門將喺周二接受訪問時就證實消息，更表明自己希望參與重建意大利足球，「呢支全新嘅意大利隊第一場比賽，我認為自己可以為一眾新兵帶嚟經驗。」咁會唔會又將退休計劃再押後先？佢就話眼下只係關注今季賽事，掛靴嘅嘢就到時再算，亦都冇講呢兩場波之後仲會唔會踢國家隊呀！
另一位仲未言休嘅老將三浦知良，周一就已經踏入51歲，雖然再入選日本國家隊嘅機會微乎其微，但佢就話只要一日唔退休，一日都唔會宣佈退出國家隊，「那怕只係同國家隊扯上少少關係，都係我繼續踢波嘅動力。」至於生日願望，佢就希望可以整番球一扭五之後射入嘅金球，仲要令馬勒當拿都讚好。