韓國神劇《太陽的後裔》嘅宋仲基同宋慧喬去年10月31號喺首爾新羅酒店舉行世紀婚禮，結婚4個月二人繼續甜蜜，不時孖住周圍去，享受甜蜜嘅婚姻生活，佢哋嘅足跡已先後去到西班牙、東京、巴黎等地，真係甜到漏油。
近日雙宋又結伴出巡，二人婚後繼續保持新鮮度，拍拖去咗濟州島旅行，有網民就留言指見到雙宋去咗濟州島一間餐廳用餐，期間仲有到商店行街，真係十分恩愛。
另外，享受緊幸福生活嘅喬妹，昨日就更新Instagram，並上載了一張大海照，唔知係唔係同老公宋仲基欣賞緊濟州美麗嘅景色呢？而喬妹就只留咗個藍色心心嘅圖案，大晒佢幸福快樂嘅心情。