內衣生產商維珍妮（2199）旗下有唔少大客仔包括Victoria's Secret、CK、adidas。老闆洪游奕噚日首度帶埋22歲孻子洪卓煒同傳媒食晏，睇佢張卡片，暫時未有任何title。
洪卓煒喺英國倫敦大學統計學系畢業，外表官仔骨骨，見傳媒時顯得有啲緊張同怕醜。洪老闆大爆阿仔12歲開始就跟他返公司，畢業後幫手打理業務，跟住佢去越南睇廠、去歐美見客。
席間，洪老闆指年輕人入行做工廠唔容易，好在阿仔肯做，洪卓煒就謙虛咁話會慢慢學。咁當然喇，56歲嘅洪老闆暫時未有退休時間表，佢有三女一仔，大女熱衷於義務工作，本身精於日文，所以早期有幫手對日本客。二女事業心重，有幫手做生意。三女就醉心學術研究，正在劍橋讀經濟碩士，仲計劃修讀博士學位。
講到bra嘅潮流，洪老闆預計運動內衣喺將來嘅大趨勢，他仲透露收工同lunch時間會到九龍灣工廠區視察，發現唔少OL趁午餐時間做瑜珈，對於bra嘅要求係可以做運動、舒適、有support同有lifestyle。
李華華