隔牆有耳：法艦訪港　空姐暈晒浪：好靚仔
男士恨見法國女兵 - 李八方

隔咗5年訪港嘅法國護衞艦「葡月號」，噚日朝8點半開放畀公眾參觀，名額700個先到先得，所以未夠鐘，招商碼頭已經有百幾個市民排長龍上艦。八方見到好多軍事迷着晒迷彩衫褲去朝聖，一睹護衞艦真身，有空姐就大讚「好靚仔」，莫非係俾班船員吸引住？原來只係話艦好靚仔啫！

軍事迷：細節好過遼寧號

專登着住解放軍民間制服嘅軍事迷蘇先生，朝早9點上艦參觀咗個幾鐘，同法軍selfie完仲未夠，仲特登留到中午，話要趁陽光充足，影埋葡月號外貌喎。佢早前參觀過遼寧號航空母艦，覺得相比之下，葡月號雖然size細啲，但勝在細節做得好，船身唔同位置都刻上太平洋島嶼語言，有文化氣息之餘，船員伙食又好，各類法式點心都做得幾精緻。
任職速遞業嘅麥先生話，特登着住二次大戰時仿中華民國飛虎隊皮衣外套襯番隻艦，佢話軍艦體積比想像中細，不過好開心有得參觀艦長室同武器裝備，如果見到法國女兵，仲可以影下相㖭。
唔好以為睇軍艦係男士專利，不少女士一場來到上洋船。任職空姐嘅梁小姐穿埋熱褲高踭鞋上艦，佢大讚「好靚仔好型」，又話驚暈船浪，以為佢講緊法仔海軍？查實佢係講緊隻艦啫，指因為風浪比較大，見隻艦都漂得好犀利，本身有暈船浪所以都有啲驚。大專生麥小姐就話，喺朋輩耳濡目染下對軍備產生興趣，所以約埋一齊參觀。