中超今日轉會窗閂門，今季由中甲升班嘅大連一方，禮拜二落實用4,800萬歐元（約4.6億港元）收購馬德里體育會一對翼鋒恩歷克卡拉斯高同奧斯華度加坦，連埋調節費今次交易幾乎使咗10億港元，上個禮拜注資落一方嘅中國富商王健林果然夠土豪！
賣馬體會股份再搞大連
話說大連一方啱啱上星期由中國富商王健林嘅萬達集團入主，雖然交易據報未完成，不過就只係技術問題箒。萬達集團曾經係前中國甲A聯賽（中超前身）球隊大連萬達嘅金主，不過千禧年就將大連萬達賣咗畀實德集團，萬達集團經過18年後回歸中國球壇，立即要大展拳腳啦！
雖然王健林離開咗中國球壇18年，但佢近年擁有馬體會20%股份，不過就喺入主大連一方前一個星期，即係情人節嗰日賣咗17%，然後再將呢筆錢用番喺今次轉會，財技嘅嘢我哋行外人就真係識條門柱咩！
中超球會近幾年就狂簽歐洲球會嘅球星，內地有關當局睇唔過眼，足協上年推出咗一項名為「調節費」嘅東西，球會假如簽入外援嘅轉會費超過4,500萬人仔嘅話，就要繳交同轉會費相同金額嘅調節費，大幅加重球會簽球星嘅成本，亦有啲似NBA嘅奢侈稅。
一眾中超球會呢個轉會窗就挑戰足協底線，好似北京國安一月就喺維拉利爾簽入射手巴卡保，轉會費成4,000萬歐元，不過國安就出蠱惑，畀錢巴卡保同球會解約，再以自由身免費加盟國安，結果俾足協警告，巴卡保仲未註冊做正式球員。而其他球會亦都怕咗調節費，引援收斂咗好多，主要轉會比較少，連廣州恒大、上海上港呢啲土豪都唔多買人（見附表），相信好似上海上港去年天價收購奧斯卡杜斯山度士嘅情況難啲出現。
重返中超高調引援
大連一方之前已經簽咗荷西方迪，加上今次高調引援，內地傳媒都認定王健林會老實繳交調節費，意味大連今次簽入馬體會孖寶就要超過9,000萬歐元，夠晒豪氣！