面對印度洋藍天碧海馬爾代夫，WiFi不順，蘋果記者信息問利敏貞震撼性衣着出自什麼品牌？大概價錢若干？
利敏貞？略有所聞，邱騰華個商經局常秘？
乜嘢品牌？乜嘢價錢？咁高深嘅問題叫我點答？
至弊係汪洋中小別墅的WiFi 慢得驚人，照片都傳不了過來，無從下手。
未幾無綫電視東張西望記者直接來電，電話訪問前，用盡辦法，將照片先傳過來讓我品嚐。
乜咁畀面啊，之不過一件衫啫，出動咁多人力物力追捧？網絡、電視、報刊立即反應不單止，陶傑、馮睎乾……人人專欄申述立場。
近廿年都冇乜邊個本地設計師，或華衣美服名人得此宣傳優惠，所以 Ball 場無新意而冷淡，創意人才流失，如非北上謀生，也已改行。
照片看過，一字：勁！
回應：不清楚何家品牌，但最近好幾個國際品牌似乎中了中國一定強的道兒，一窩蜂推出新系列重點類同奧斯卡金像大導貝杜魯奇當年在故宮拍的《末代皇帝》，當時中國國勢激勵不了清廷宮服潮流，反而近期成為熱潮，大概時裝創意界春江水暖鴨先知，洞悉天朝行情了。
利敏貞疑似清廷宮服，重點在幾塊大花大朵肩甲，被新聞界直銷，贏了幾個正面功能：
1, 恰如其分：商經局常秘，推廣經濟不遺餘力；以利女士的年齡、身形卻「勇」字行頭，從女高官從未試過的超短可愛髮型到肩膊重甲花呢花綠飲衫着實有過人之處。
2, 關注中老年人口：唔該望望中環半山到慈雲山、觀塘半山年齡身形類同的女性數量之眾，人人黃面婆臉如土色，邊個有阿貞一半咁型？可見未來一段日子，效法「貞裝」大行其道，廠家有訂單、工人有工返、小商得商機，一件衫的效力如此深入民間；對阿貞，對邱騰華，我都力撐！
3, 循環再用、環保：「貞裝」石破天驚，不單止清裝，衣裳細節在時裝歷史上，不斷用上。上星期，擁中國血統超模黑珍珠納奧美金寶出席白金漢宮活動；是中英皇家感應？是預見「貞裝」出位，率先解圍？穿上一襲青金色層層肩甲一代大師Pierre Cardin 卡丹70年代Vintage、鋒頭一時無兩。雷同設計曾亦出現在一代黑人歌后戴安娜露斯 Diana Ross 領銜主演兼設計服裝的70年代電影 《Mahogany》。