曼聯周日贏咗車路士後，球員有幾日假期，但唔係個個都可以開心放假，安達靴里拉就幾愁嘞！西班牙檢察部門向華倫西亞法庭提出訴訟，起訴包括靴里拉在內等35名球員，指控佢哋喺11年薩拉戈薩對利雲特嘅西甲比賽，透過當時效力薩拉戈薩嘅靴里拉，收賣利雲特球員，最終薩拉戈薩贏波護級成功。
檢察部門表示，如果罪成，靴里拉需要坐四年監，外加六年停賽。至於周日場波，曼聯領隊摩連奴喺比賽尾段將一張小紙條交畀後備上陣嘅艾歷拜利，再轉交尼曼查馬迪，仲吸引到韋利安偷睇。字條入面係咩內容呢？尼曼查馬迪就喺ig開估，原來係寫住有三日假期，至於係真係假就唔知喇。另外被傳同摩連奴翻面嘅保羅普巴一於少理傳聞，襯放假同阿哥喺屋企跳吓舞，仲放埋上ig呃like。