年初六夜馬，一共有九場，頭八場左丁山不知如何，腦筋混亂，總係顧此失彼，中膽輸腳，中腳輸膽，輸足八場，到第九場仲要睇吓張現金券剩番幾多錢。於是逼自己細心重溫前8場嘅賽果，居然找到兩個特點，（一）自第四場開始，2號贏完就到5號贏，四、六、八場係二號贏，五、七場係五號第一，咁第九場咪輪到5號贏？（二）全晚黃色彩衣馬入三甲比率好高，連第八場嘅大冷馬，99倍之「勝利寶石」都殺入與大熱門「天下為攻」串Q，派彩千三蚊。於是諗起立法會議員林健鋒係馬主綵衣顏色專家，每次在馬場見到佢問佢有乜心水，佢就講：紅色、藍色之類，佢唔肯解釋原因，但又經常贏馬喎。於是驚醒，年初六晚上跑馬利黃色，第九場3號「軍民歡」Good Omen就係黃黑色，5號「勇冠王」黃綠色，7號「金獅叻將」黃藍色，12號「勁有波幅」灰黃色，於是把心一橫，要齊四隻，再加上大熱門10號「放眼量」，買一條四連環再加五串十鴛鴦Q。可惜醒覺得慢，諗到呢個顏色投注法時，已亮起紅燈，擒擒青去填飛落注，竟然漏買四重彩與三重彩。結果係點？咪係順次序5、12、3、10四隻返嚟囉，四連環派7680元，連贏與位置Q共收2519元，來一個人民大翻身，反敗為勝，唉，四重彩派21萬3千9百，慘失良機呀。
收錢之時，自然笑呵呵，一位老友亦笑到合不攏嘴，原來佢一早認為「勁有波幅」（12號）有機會，3號「軍民歡」馬主與第6場2號頭馬大熱門「軍歌」嘅馬主係同一家人，皆內地富商，既然贏咗「軍歌」，仲唔博埋冷門「軍民歡」（86倍）咩，於是係咁意買100元3號12號位置Q，收番一萬元派彩！
賭馬真係要講臨場執生，靈感一到，有時勝過賽前研究五個鐘頭。講起嚟「軍歌」英文名稱叫做Born in China，馬主郭芹君、郭浩（父女關係）與趙怡（北京富豪），「軍民歡」嘅馬主就係郭芹君，呢一家擁有幾隻馬，隻隻以「軍」字開頭。將隻馬叫做Born in China，想必然內有含意。近年馬場多咗內地人馬主，佢地在拍賣會上舉手之豪氣，令本港馬主退避三舍。最大手筆嘅當然係潘蘇通，一千萬元買一隻馬視若等閒。預料十年之內，內地馬主大有可能買齊買夠靚馬，橫掃本地經典大賽及國際賽事，佢地甚至會進軍澳紐英法，角逐墨爾本盃，凱旋門大賽與葉森打吡㖭，Born in China馬主一於出洋為國爭光啦！