估唔到野豬都有個專屬嘅英文名！自由黨山頂區議員楊哲安，一上任區議員就俾野豬咬爛鞋，佢噚日喺自由黨新春團拜活動中講到，最近野豬問題有惡化趨勢，就連《每日郵報》都報道，又將山頂嘅野豬命名為「Pigzilla」，點估到佢哋因為「生養眾多」且活躍於山頂而蜚聲國際？楊哲安對此都話唔知好嬲定好笑，呼籲局方do something，免野豬問題成為國際笑話。
佢自己亦就Pigzilla問題有所行動，日前就聯同多個區議員同政府代表實地考察，講笑話，「野豬一年可以生12個，之後就會倍數增長，最後可能進佔山項，到時真係唔得掂」。佢又話野豬聚居地好接近學校，希望當局正視，以免嚇親小朋友，並呼籲居民唔好再餵食，以免問題越來越嚴重。