財政司長陳茂波向不同階層「派利是」前夕，李嘉誠基金會搶閘做財爺頻頻派錢。繼早前向惜食堂捐出一千萬後，香港教育大學亦宣佈獲捐一千萬，藉此支持創意教學，推廣電子學習平台。
千萬助教大創意教學
教大喺新聞稿話，呢次捐款會首次用嚟支持兩個電子學習平台──分別係由史丹福國際研究所開發、推動本地中學數學科電子學習「基石數學」（Cornerstone Maths），以及由多倫多大學設計、結合英語學習以發展批判性思維嘅Arguendo，目的係以優質教學方法，裝備本地在職教師及準教師。教大同時會以捐款設立6項獎學金，表揚喺體育、音樂、視覺藝術等領域學術成績優秀嘅學生。
教大校董會主席馬時亨多謝基金會支持，相信受惠學生日後會為社會作出貢獻。