DQ呢家嘢，咪以為只發生喺立法會議員身上，新當選為港區人大代表嘅經民聯張俊勇（Thomas）憶述當年喺九龍華仁做學生會主席時，曾經試過因為唔熟規程，做咗一啲唔多對路嘅決定，被提不信任動議，最終逃過被DQ一劫。
自爆細個會郁細佬
1970年出生嘅Thomas同工聯會理事長吳秋北一樣係今屆最年輕嘅港區人大。爹哋係潮州商會前會長張成雄，有兩個細佬嘅Thomas自言由細到大都好有「阿哥款」，「細個會郁佢哋㗎，哈哈！」
佢話讀書都算乖，唔使人逼都會自動波。初中喺聖芳濟書院度過，中四轉去九龍華仁，其間領洗成天主教徒兼做Altar Boy，中六嗰年仲競選學生會主席並當選。問佢任內有乜新猷？佢話：「有㗎，14間學校做joint school summer project，9間係女校，多過上一屆㗎，哈哈！」佢憶述當年幾乎被DQ，印像中好似因為唔熟規程而做錯決定，最終喺不信任動議下死裏逃生。
佢中六後到美國升學，喺威斯康辛州大學讀數學與電腦及統計學，之後喺康奈爾大學工程學攞到運籌學及工業工程學碩士學位。90年代初返港並往中國發展，2003年同金朝陽太子女陳慧苓拉埋天窗。