林鄭上周洩密指囤地波明天的預算案會有「驚喜」。坊間認定囤地波一定派錢，而且派得多過2011年鬍鬚曾的六千元。政府有Q，會唔D？庫房水浸上眼眉，有錢？會唔派？驚喜嘛，應該唔止六千，係六萬才happy Lunar New Year。喔喔，不不，Lunar惹火了強國人，不夠中國夢，不顯習帝神威， 超模都要道歉兼改口說Chinese New Year。Lunar唔like，六千當然嫌少，十倍奉還吧，老點的777政府！
派錢派七次，比叫人洗手洗手洗手經典。林鄭上任未幾已想連任，派七次錢，與講七次大話一樣，難唔到佢。史無前例年年派錢，強國撐腰，西環行埋，DQ無停，掌握新時代脈門的林鄭，先派甜品，跟手，叫潘鄭搞23條，立法會內，潘鄭未開腔，陳帆自動波埋站護航。雙鄭搭陳帆，一王雙后，借利敏貞套飲衫打底，眼前便是一幅清廷秘史宮闈畫。三位手上握住花碌碌鈔票，潘鄭手中是因公忘私首置慳到的稅款，陳帆雙手捧着補貼必蝕高鐵的N億公帑，林鄭呢，深夜撲去7仔搵廁紙空手而還的遺憾終獲平反，派銀紙而非廁紙，讚啦。只有灰心的網民悲歎，六千元，連賭王千金新春期間豪玩沙蟹的「碎銀」都不如。