潮屬社團總會噚日舉行新春團拜，身為「架己冷」嘅財政司司長陳茂波原本都答應出席，卻臨時甩底，唔知有乜急事要處理，但都仲有另一位「架己冷」局長撐場，就係食物及衞生局局長陳肇始，而本身非潮州幫嘅教育局局長楊潤雄亦畀面出席。
但要數現場最風騷嘅唔係呢兩位局長，而係曾經捲入前特首曾蔭權涉貪案嘅深圳東海集團主席黃楚標，只見黃楚標笑容滿面滿場飛，唔知同盛傳身為全國政協嘅佢，有望喺升呢做專委會副主任有冇關？若然消息屬實，可能對政界都有啲重要啟示喎。
岳少趁機向鄉親拉票
身為總會監事會主席嘅林建岳致辭時則提到補選即將舉行，呼籲潮籍鄉親加大努力支持愛國愛港參選人。嘩，連新春團拜都要為補選谷票，咁瞓身幫忙，難怪岳少都係升呢全國政協常委大熱啦！