經過尋日（25日）連場精彩大賽後，又輪到評磅員為一眾當日參戰馬，經過嚴謹又精準嘅計算下，喺今午（26日）得出並公佈各匹馬嘅最新評分。
尋日十一場沙田日賽產生嘅話題真係幾多，先有藝人蘇志威名下嘅「駿王」經歷第八次愛可戰勝一切嘅賽事之後，終於喺尋日嘅第7場贏馬，呢次勝仗為呢匹鄭廐馬帶嚟7分，最新評分升至64分，下仗就要返回三班跑，唔知蘇志威有冇機會，喺今季再拉頭馬呢？
另外，本港首匹唔使兩分鐘跑完2000米嘅應屆香港金盃盟主「馬克羅斯」，略略俾評磅員加上1分，最新升至生涯最高嘅127分，與「澳斯卡」並列本港第三高分馬匹。
另一邊廂，亞軍明月千里及季軍四季旺冇加分，但殿軍「巴基之星」直?10分至123分，再一次刷新其役內評分新高。值得一提，「巴基之星」對上一次贏馬喺16年12月27日嘅新馬錦標（1400米），當時只評91分，其後六戰都冇贏過下，都升到咁高分，睇嚟「巴基之星」真係好受評磅員關注。
最後，喺三班1200米輕鬆大勝對手近五馬位嘅「精益求精」，結果受評磅員高度關照，大刀闊斧加呢匹馬13分，升至80評分，但仍可留待三班出戰。