負責本港醫生專科培訓嘅香港醫學專科學院今年成立25年，噚日特別舉行25周年慶祝活動啟動禮暨傳媒春茗，食物及衞生局局長陳肇始出席主禮，仲同醫專主席劉澤星及一眾分科學院的代表祝酒，當中包括久未露面嘅衞生防護中心前總監曾浩輝，原來佢係今屆醫專香港社會醫學學院嘅院長。
醫專25年主題為「弘醫道‧育專才‧建未來」，劉澤星話呀，今年會舉辦一系列活動，包括年度醫學教育會議等。佢哋又會繼續推廣器官捐贈，指2017年每百萬人中只有5.5人捐出器官，腎臟移植過去10年數字更停滯不前，每年得80宗移植個案，輪候人數達2,153人，輪候時間平均51個月，醫專叫市民要踴躍支持器官捐贈。