做議員有咩條件？除咗唔好俾特區政府DQ之外，原來仲要「八德」！噚日立法會搞春茗，立法會主席梁君彥致辭時就借狗年為題發揮，話狗有「八德」，希望特區政府官員同議員都可以喺唔同崗位，發揮八德去服務市民，強調唔係「吠得」，似乎意有所指咁噃！
民主派都算畀面噚日場春茗喇，總共有5位議員現身，包括內會副主席郭榮鏗、民主黨黃碧雲同涂謹申、專業議政邵家臻同葉建源，比起689年代民主派杯葛出席好好多咯。
身為主人家嘅梁君彥致辭話，民間形容狗有八德，即是忠、義、勇、猛、勤、善、美、勞，但並不包括「吠得」，所以佢都希望官員、議員發揮八德服務市民，然後大讚林鄭上場後行政立法關係有改善，因為林鄭唔止同議員WhatsApp，仲每月出席質詢時間㖭。
黃碧雲狙擊鄭若驊
黃碧雲噚日咁啱坐咗喺律政司長鄭若驊隔籬，所以就趁機向佢解釋一地兩檢問題，但佢話鄭若驊似乎唔係咁聽得入耳，只係重申唔覺得一地兩檢違反《基本法》，而且政府、立法會都會把關喎，碧雲即刻反駁，𠵱家立法會根本冇能力制衡政府，點把關呢？同枱仲有同樣負責一地兩檢嘅保安局長李家超，碧雲話李家超都嘗試加入討論，問番佢有冇去過深圳灣睇吓呀？碧雲就順手提議埋遲吓去大灣區考察時用深圳灣口岸過境，成唔成事暫時未知。
李八方
