年輕騎師貝湯美來港長駐發展前，憑過氣灰色神獸「尚多湖」於澳洲打響名堂。今季佢來港做大摩主帥，代價就係將「尚多湖」帥權，拱手相讓予同鄉騎師艾道拿。
結果後者亦隨之喺澳洲撈得風生水起，今季亦取得兩歲雄馬Estijaab的帥權，該駒成為澳洲兩歲馬最強之戰金拖鞋大賽列強之一。
艾道拿於Estijaab在上周六（24日）跑金拖鞋預賽銀拖鞋大賽前，喺當地一個午宴上，率先聯同一位女嘉賓進行電子騎馬機比賽，進行賽前熱身。
佢以行動解釋專業一詞的意思，說明不論真定假，只要上咗馬鞍，騎師一定要攞出120%的實力同鬥心。
當賽事臨近最尾階段，本來慢條斯理的艾道拿即刻戰神上身，展示平日搏馬的勁力，不斷狂搖部騎馬機，令到部機甚至發出一啲怪聲，似乎部機對艾道拿的力量有啲吃不消。
不過，唔知係咪艾道拿用力過度，其後Estijaab於銀拖鞋賽事中，鬥輸俾在騎師郭立基胯下四戰三勝的Sunlight，只能飲恨得第二名。
圖片來源：互聯網