郭富城早前兌現好多好多年前嘅承諾，派咗封利是俾所有香港人，仲將呢封利是捐咗俾聯合國兒童基金會。
講開兒童，城城同城嫂Moka囡囡Chant，早前就收到古巨基間餅店送嘅曲奇，城城仲喺ig話，Chant原來只係乳名，全名叫Chantelle。
當年城城同Moka宣佈拍拖，就係喺車上面影咗張手拖手嘅相，昨日Chantelle同大家拜年，城城又喺ig擺咗張手仔相，Chantelle着到紅噹噹咁右手疊住左手，仲拎住咗個紅色蝴蝶結頭箍，但就見唔到樣。城城留言代祝「新年好」。其實年初四，Moka都抱Chant出嚟拜年，同樣都係見唔到Chantelle個樣，但就見到Chantelle手仔放喺媽咪心口，Moka同樣都係留咗「新年好」，拜年熱熱鬧鬧唔嫌多嘅，但幾時先會帶Chantelle出嚟見下大家呀？