身兼東區太古城西區議員嘅民主動力召集人趙家賢早前因為民主派搞立會初選，頻頻出鏡，除咗初選Plan B安排，連佢嘅尖尖頭都成為「焦點」，至於點解要搞到個頭咁？原來佢有苦自知，因為開始甩頭髮，所以髮型師就教佢咁樣gel個頭，睇落冇咁疏落。
唔少人見到呢個髮型，就諗起《IQ博士》嘅栗頭老師，亦有人話似小丸子嘅永澤同學。不過頭髮問題事少，趙話初選時嘅Plan B爭議，一度令佢精神緊張，血壓曾飆高至170，「自己都心痛，我都係希望做好件事。」仲話有時喺呢個政治漩渦糾結太耐，返去自己選區太古城服務街坊仲開心。