噚日中午有個立法會補選論壇，探討基層住屋問題，九西候選人之一嘅民建聯鄭泳舜（Vincent）缺席，到底咩事緊要得過要聽基層市民心聲？
原來曾鈺成噚日中午到大角嘴為Vincent站台，仲即席揮毫寫「學有所成」四字，送畀Vincent兼今日返學嘅學生。兩位席間仲談論教育資源同政策，曾鈺成話最近有老師同佢分享，話「學」字上半部好似頭殼，代表學生要學習好多嘢，強調佢同Vincent都希望小朋友得到嘅教學係有意思而唔係冇用處嘅操練。Vincent話學生功課壓力太大，家長開支亦唔少，若然當選會推動學校減少功課同多設導修課，等學生盡量喺校內完成功課。九西參選人仲有姚松炎同蔡東洲。