守門員喺足球比賽中派膠並唔係乜嘢新鮮事，不過星期六進行嘅一場德乙聯賽，杜伊斯堡門將菲利根就因為轉身飲水失波，七分鐘前啱啱救完一球12碼嘅佢即刻由英雄變狗熊！
杜伊斯堡對恩高斯達特嘅德乙聯賽，第18分鐘杜伊斯堡一次入球被判無效之後，恩高斯達特作出反擊，當杜伊斯堡後衛謝列紐巴爭贏客軍前鋒古舒基，將個波頂返畀己隊守門員菲利根，點知喺第11分鐘曾經撲出12碼而成為英雄嘅呢位荷蘭門將竟然轉身飲緊水，畀古舒基將個波射咗入網而失守。好彩嘅係，杜伊斯堡最後都贏2:1，冇因為菲利根派膠失波而輸咗呢場比賽。不過，飲水唔啱時間嘅菲利根都知衰，佢賽後話︰「下次我唔會將水樽放喺龍門入面喇。」