大律師公會每年都會舉行Bar Mess，宴請公會成員聚首。上周五嘅周年Bar Mess，出席者眾，但大狀向八方報料，現場人士所見，好似少咗一啲熟悉面孔。據聞未見影嘅「常客」，唔少都來自年年「晒馬」出席嘅Temple Chambers，計有大律師公會前主席石永泰、譚允芝同湯家驊喎，佢哋全部都係撐林定國連任主席，但林最終敗喺戴啟思手上。
有大狀話，法律界內都有消息流傳話唔少大狀會因為公會之前嘅選舉而「杯葛」今次活動，咁啱又真係好多知名大狀缺席喎。而以往，時任律政司司長都會出席，但今年新司長鄭若驊又係影都冇。
到底係小器未放得低選舉恩怨而缺席，抑或撞正新春有好多人唔在港唔得閒？八方無從稽考，報料人就話好好哋一個Bar Mess搞成咁，真係What a mess喎！