一click免費下載《籽想去東京》旅遊指南：http://bit.ly/2rSv4c4
全新旅遊專頁，即like籽想旅行：https://fb.com/travel.appleseed
農曆新年話咁快又嚟到尾聲，家家戶戶去拜年，年糕蘿蔔糕食到個個肥肥白白，又係時候約埋屋企人朋友行山繼續行個大運兼露營！今次由擁有超過10年行山經驗嘅行山達人Sam帶大家行馬鞍山郊遊徑到昂平草原，全程只需三公里，啱晒一家大細行。
達人教路除咗喺馬鞍山郊野公園作為起點，仲可以由馬鞍山耀安邨搭村巴NR84到總站落車，再步行約50分鐘，但大家要留意村巴班次比較疏。整條郊遊徑初段以平路為主，沿路仲可以去埋鞍山探索館。進入密林，就開始多石級同斜路，途中會經過小山澗，如果鞋底無防跣嘅朋友就要特別小心啲。
上到昂平草原風景雅緻開揚，天氣好嘅時候仲可以飽覽整個西貢市同內海，好多人會為咗個靚景而特登上嚟玩滑翔傘同野餐。而昂平營地基本設備齊全，有旱廁同燒烤爐，如果大家想趁新春去露營，就要帶齊睡袋同地墊等裝備，就唔怕凍親，可以舒舒服服享受露營之樂。
採訪：Asia @有種運動
攝影：Asia and Wing@有種運動
剪片：Asia@有種運動