狗年最得人鍾意嘅動物，可能都係狗仔咯！MegaBox今個農曆新年特別設置全港首個《PAW Patrol 汪汪隊立大功》大型賀年裝置，5位《PAW Patrol》主角都第一次換上賀年裝，其中10呎高着上唐裝嘅Chase就企正中間同大家拜年，相信唔少訪客路過時都有同佢影相selfie。
MegaBox噚日亦有開年活動，特別邀請國際級醒獅隊伍演出，其中一隻醒獅靈活攀上15呎高，一柱擎天表演採青高難度雜技（圖），其後一雙醒獅就隨鼓聲節奏穿梭喺梅花樁之間，圍觀市民落力拍掌兼嘩嘩聲！MegaBox新春期間人流同消費都比平日增加約一至兩成，狗年之初似乎有個好開始。