擾攘多年嘅活化中環街市項目（圖）再有新進展。負責項目嘅市建局行政總監韋志成喺網誌提到，市建局舊年10月接收中環街市用地後，請咗理大可持續城市發展研究院院長滕錦光視察結構，建議引用新型修葺物料「纖維增強聚合物復合材料」（簡稱FRP）為大樓做復修加固，呢種物料可以黏合柱、樑同樓板等構件外層，增加強度但又唔會影響街市外觀，仲話最快下個月可以就復修方案向屋宇署提交書面查詢同審核，期望活化工程4年內完成。
韋志成又話2010年市建局委託顧問勘察街市結構，初步評估過需要復修嘅混凝土面積有成2.5萬平方米，即係足足60個標準籃球場，但由評估至今已七、八年，估計混凝土鬆脫情況會更嚴重，所以顧問今年下半年會為街市做全面「body check」確定復修範圍。市建局下月仲會喺大樓外部覆蓋一層圍幕，幕上展示街市活化後嘅設計，等市民望梅止渴。