星期日天朗氣清有乜做？特首林鄭月娥噚日就孖住勞福局局長羅致光出動，到訪「深井光屋」同住客喺天台打邊爐，烚吓烚吓食開年飯，仲即場收割居民喺天台農圃自家種植嘅生菜，主持「撈起」儀式，祝所有人事事順境，一年勝過一年，唔知林鄭今年會有乜大計，可以令自己撈到風生水起？
任政務司長時促成項目
「深井光屋」前身係屬於工廠員工宿舍嘅閒置政府物業，係首個政府同社企「要有光」嘅合作項目。「要有光」係獲商界捐款下將大樓翻新成40幾個租住房屋，以低於市價嘅可負擔租金租畀有住屋困難嘅基層家庭，租期最多三年，而呢個係林鄭在任政務司司長時促成嘅項目，一直視為佢嘅baby，過往都多次探訪光屋居民，今次仲喺居民平日gathering嘅天台打邊爐。
佢話欣悉唔少居民喺「光屋」居住期間家庭情況逐步改善，加上專業社工嘅輔導同鼓勵，成功重新起步，為自己同子女嘅未來奮鬥，同時感謝「要有光」一直以嚟嘅努力，話自從2012年9月起推出首間「光房」後，連同「深井光屋」，至今已經提供逾100個住宅單位，惠及約200幾個家庭合共逾600個成員。
李八方
