韓國人氣綜藝節目《Running Man》(RM)嘅成員金鐘國，不時都會上其他綜藝節目做嘉賓。
金鐘國早前就擔任聽日播出嘅節目《我家的熊孩子》嘅嘉賓，佢喺節目內仲好大犧牲，帶攝製隊來到佢同父母居住嘅屋企，仲首度公開自己間房。
現年41歲嘅金鐘國一向出名孝順，雖然已大個仔，但佢就未有考慮搬出去住，反而就同父母一齊住。而金鐘國間房就唔算大，大約有100呎，連佢自己都笑細到腳都放唔落，從中可見佢間房了放一張大床同埋一張梳化後，已經冇乜位置，而周圍就佈滿佢嘅衣服，睇起上嚟都幾凌亂。
金鐘國亦直認連媽媽都嫌棄佢間房好亂，又話佢乜嘢都唔捨得丟棄，金鐘國亦坦言自己唔會丟棄物品，慶幸佢準備搬家，亦可以借此機會好好執拾細軟。