【閃耀人生人心 袁詠儀系列之番外篇 老公反擊】
袁詠儀（靚靚）最近接受《蘋果》女人心系列連載式專訪，提到不少關於老公張智霖（Chilam）及囝囝張慕童（魔童）的事，每天追看的Chilam終於開腔回應老婆的「指控」，包括靚靚指他經常不打扮。
Chilam笑言：「如果我呢個嘜頭，再着得好dress up呢，人哋會覺得你好扮嘢㗎！即係要down to earth啲囉，如果我唔係咁嘅樣，我會dress up囉！」
認教仔太寬鬆
對於靚靚指他教仔太寬鬆，他承認：「時常都話毋忘初衷嘛！我哋時常都話只想小朋友健康快樂地成長，可能有時你會聽身邊啲家長講得多，會對自己個小朋友有好多要求，某程度上我覺得會磨走咗一種好似稜角嘅talent，我覺得唔應該咁。話我教育好寬鬆，呢件事我完全唔否認，因為我哋都知道，生活係幾咁困難啦！亦舒曾經講過，小朋友細個你唔寵佢，到大個已經有咁多艱苦喺面前，咁點解當佢仲係小朋友時候，你唔對佢好啲呢？」
靚靚在訪問中提到魔童曾揚言要換媽咪，Chilam形容是因果關係，他嘗試做潤滑角色，但這是命運。至於靚靚稱患產後抑鬱時會亂發脾氣，Chilam大膽謂：「其實唔係嗰段時間，佢一向都係咁，你話𠵱家唔係咁咩？但大家要學點樣去包容對方，我覺得冇人係完美，我點會冇犯錯，可能拍戲對工作人員講嘢，都會問自己今日語氣係咪重咗，會反省。」
提醒顧人感受
靚靚向來說話不經大腦，Chilam指有時會提醒她要顧及別人感受：「你對某啲人直啪嘞，但係對你尊敬嘅人會唔會咁？好值得三思喎！你鍾意直啪嘞可以繼續，要闖禍就繼續去闖，我唔覺得要改變對方，某程度上欣賞佢直啪嘞！」
Chilam又向靚靚發表愛妻宣言：「佢喺我眼中冇乜缺點，因為你哋所形容嘅缺點，或者佢自己認為嘅缺點都只不過係一個人嘅性格，我唔覺得要去改變，大家喺呢一刻都仍然有個熱情去維持呢個家庭，我覺得已經係最好不過。」
採訪：陳月媚
攝影：倩宜、林德雄
化妝：Kerry Wong
髮型：Sam Pan Of Muse Hair