狗年汪汪，果然旺丁旺財！海洋公園年初一到初六自由行旅客按年多咗35%，餐飲收入升10%，12月初推出嘅VR過山車至今已經有10萬人次玩過，日日大排長龍。
開心事點少得嫁娶環節？海洋公園話想今年做多啲婚宴生意，要擺過百圍嘅，6月開張嘅萬豪酒店個巨型宴會廳就啱晒。
而唔想大搞嘅新人，都仲有兩間園內餐廳選擇，海洋公園仲特登翻新咗熊貓餐廳，4月改名「熊貓薈」，襯番婚禮莊嚴主題；海洋公園下個月再翻新埋海龍王餐廳，兩間餐廳都夠擺十幾圍坐200幾人，仲加裝咗新娘房，調校埋入場射燈位置，包保新娘子到時靚足全場。
公園管理及演藝節目執行總監吳守堅話𠵱家一年都有100、200次「求婚求助」，搵公園職員助攻求婚過程，話成功率都九成幾，至於唔得嗰少數人，佢笑笑口話應該都唔關海洋公園公園事。