特首選戰差不多過咗一年，去年同林鄭月娥及曾俊華過招嘅退休法官胡國興，最近竟然留鬚，莫非受薯片叔啟發跟上留鬚熱？
一臉白色鬍鬚嘅胡官噚日出席中總酒會，話留鬚純粹因為懶，「每日剃鬚好辛苦，每日要剃三個字（15分鐘）」，指呢個新造型已近兩個月，笑言選舉後成個人放鬆咗好多，噚日要着全套西裝出席活動都覺辛苦。問到最近忙乜？佢話冇嘢忙，每日都唔使做嘢，新年亦留港，同兩個孫仔過新年。
佢話選舉後同曾俊華兩個人食過一次飯，大家只係傾吓偈；問到娥特有冇搵佢拜年時？佢就話冇。談到娥特上任後表現，胡官話「開波好似開得幾好，但𠵱家又好似有啲嘢不能盡如人意」，自己新年願望係香港可以變得好啲，覺得現時香港股巿好，唔一定等於經濟好喎。