特首林鄭月娥噚日朝早至中午連走三場，佢喺八和會館新春團拜上同前特首梁振英同場現身，但兩人幾近零交流，後來全靠八和主席汪明荃坐中間，先同枱影到張合照。之後娥特出席中總團拜，就同中總會長蔡冠深行得好埋，蔡冠深爆料，話娥特已經答應未來一年出席四場中總搞嘅活動，包括4月20日出席大灣區論壇，難怪蔡冠深話林鄭好畀面中總。
查實中總喺一眾商會中，嗰支愛國愛港紅色旗幟舉得最高最挺，唔通特區之首，夠膽唔同呢面紅旗「行埋」咩？林鄭亦好識做，大讚中總多年來對香港經濟作出極大貢獻。
阿姐成功爭取開台表演
曾經不滿西九戲曲中心開幕表演唔係由八和負責、批評西九管理局「有事鍾無艷，無事夏迎春」嘅汪阿姐，噚日透露經過連番協調，已經成功爭取八和負責戲曲中心「開台日」同「開台周」表演嘞。
汪阿姐形容事件「有理說不清」，中間有啲細節，似乎西九管理局都唔太清楚，但話明唔緊要，因為最後都溝通咗，佢透露同西九管理局溝通過幾次，「過程有爭拗係必然」，但都重申政府機構同「好叻嘅行政人員」要更多了解業界需要。